Польшча ў Беларусі

Польская школа пры Пасольстве Рэспублікі Польшча ў Рэспубліцы Беларусь была створана як Школьны кансультацыйны пункт згодна з Пастановай № 126 Міністра нацыянальнай адукацыі ад 3 снежня 1999 г. З самага пачатку гэта дзяржаўная школа, якая дзейнічае ў рамках польскай сістэмы адукацыі. Навучанне бясплатнае, яно дае магчымасць вывучаць родную мову, паглыбляць веды пра Польшчу, яе звычаі і культуру. Дзеці – грамадзяне Польшчы, якія часова знаходзяцца за мяжой, а таксама дзеці польскага паходжання маюць магчымасць вучыцца на ўзроўні пачатковай і сярэдняй школы з атрыманнем адпаведных пасведчанняў Міністэрства нацыянальнай адукацыі. Лічба вучняў сістэматычна павялічваецца, і ў гэтым годзе школу наведваюць 216 вучняў.
 
Дырэктар Бэата Александровіч расказала пра дзейнасць Польскай школы, дзе вучні знаёмяцца з цікавымі людзьмі, развіваюць свае моўныя кампетэнцыі дзякуючы ўдзелу ў агульнапольскіх праграмах чытання літаратурных твораў, спаборніцтвах дэкламатараў і арфаграфічных конкурсах. Дзякуючы асабістаму актыўнаму ўдзелу і самаадданасці настаўнікаў школы вучні развіваюць сваю грамадскую актыўнасць: прымаюць удзел у дабрачынных праграмах для хворых дзяцей і дзяцей-інвалідаў альбо дапамагаюць у прытулку для катоў. Перш за ўсё, дзеці знаёмяцца з польскімі традыцыямі і гісторыяй. Апрача актыўнага ўдзелу ў традыцыйных польскіх святах і абрадах, такіх як Анджэйкі і калядная батлейка, вучні ўдзельнічаюць у восеньскім упарадкаванні магіл на рымска-каталіцкіх Кальварыйскіх могілках у Мінску, а ўвесну і ўлетку падчас падарожжаў па Беларусі знаёмяцца з мясцінамі, якія аб'ядноўваюць гісторыю Беларусі і Польшчы. Апошнім часам вучні Польскай школы наведалі Мерачоўшчыну – месца нараджэння Тадэвуша Касцюшкі, а таксама Смілавічы, дзе нарадзіўся Станіслаў Манюшка.
 
Найбольш урачыстым момантам святкавання стала прысвячэнне ў вучні 23 першакласнікаў. Дзеці падрыхтавалі кароткую мастацкую праграму і прынеслі прысягу. Урачыстае прысвячэнне ў вучні праводзілі Пётр Апасталідзіс, Консул Рэспублікі Польшча ў Беларусі, і Бэата Александровіч. Консул пахваліў дзяцей за ўзровень валодання мовай і пажадаў ім стойкасці і поспехаў у вывучэнні мовы, традыцый і гісторыі Польшчы – краіны іх продкаў. Пасля афіцыйнай часткі прыйшоў час і для адпачынку.
 
На сцэне, апрача вучняў Польскай школы пры Пасольстве Рэспублікі Польшча, выступілі таксама госці і сябры навучальнай установы: хор настаўнікаў „Gloria Mater” і дзіцячы гурт „Polska Do-Mi-Sol-ka”, якія дзейнічаюць пры ГА „Польска Мацеж Школьна” ў Мінску. Упрыгожыла канцэрт сольнае выступленне спявачкі Надзеі Бронскай, уладальніцы шматлікіх узнагарод, у т.л. І прэміі міжнароднага конкурсу песень Ганны Герман „Tańczące Eurydyki” 2007 г. і II прэміі Конкурсу патрыятычнай песні „VIVA POLONIA”.