Польшча ў Беларусі

Мінскі аркестр пад кіраўніцтвам польскага дырыжора выканаў „Байку” Станіслава Манюшкі і Неманаўскую сюіту – спецыяльную аранжыроўку твораў Чэслава Немана для сімфанічнага аркестра. Яе, па замове Пасольства Польшчы ў Беларусі, напісала польскі кампазітар Зузанна Фалькоўская.

„101 год таму тысячагадовая Польская дзяржава зноў стала свабоднай. Незалежнасць і суверэнітэт блізкія кожнаму народу, але асабліва іх цэніць той, хто быў вымушаны за сваю свабоду змагацца”, – сказаў Пасол Польшчы ў Беларусі Артур Міхальскі. „Мы 123 гады былі пад акупацыяй. Мы ацалелі і вярнулі сабе свабодную радзіму дзякуючы беражліваму захаванню мовы і культуры, дзякуючы многім выдатным асобам”, – падкрэсліў пасол. „Незалежнасць – гэта не толькі магчымасць свабодна разважаць пра сваю гісторыю, гэта, перш за ўсё, магчымасць свабодна выбіраць сваю будучыню, фарміраваць свой лёс самастойна, згодна з воляй і памкненнямі народа”, – адзначыў ён. І падкрэсліў, што Польшча „адчувае глыбокую сувязь з сям’ёй свабодных еўрапейскіх народаў і імкнецца быць добразычлівым суседам, у тым ліку Беларусі”, сведчаннем чаго з’яўляецца, між іншым, ініцыяваная 10 гадоў таму разам са Швецыяй праграма „Усходняе партнёрства”, накіраваная на мадэрнізацыю краін – усходніх суседзяў ЕС.
„У вас ёсць права ўдзельнічаць у стварэнні суверэннай, незалежнай Беларусі і прыўносіць сваю культуру, традыцыі, мову, сваю гістарычную памяць. У вас ёсць таксама права на свабоду аб’яднання. Я веру, што працэс ўсведамлення гэтых асноўных рэчаў стане паўсюдным і прывядзе да адпаведнага рашэння”, – сказаў пасол, звяртаючыся да палякаў, якія жывуць у Беларусі.
 
„Як і для Беларусі, польскі шлях да суверэнітэту і незалежнасці быў доўгі і складаны. На працягу стагоддзяў і беларусы, і палякі прайшлі праз шмат выпрабаванняў”, – сказаў са свайго боку намеснік міністра замежных спраў Беларусі Алег Краўчанка. „Польшча знікла з карты, але змагла не толькі адрадзіцца, але і ўзмацніцца і стаць уплывовай і моцнай дзяржавай у глабальным і рэгіянальным вымярэнні”, – падкрэсліў ён. „Ініцыяваная разам са Швецыяй праграма „Усходняе партнёрства” – гэта карысная праграма, якая ўзмацняе супрацоўніцтва нашай краіны з ЕС”, – падкрэсліў намеснік міністра. Краўчанка ўзгадаў важныя моманты агульнай гісторыі, у тым ліку змаганне ў бітве пад Грунвальдам, „на правільным боку”, у гады Другой сусветнай вайны, а таксама Люблінскую ўнію, 450-годдзе якой адзначаецца ў гэтым годзе. „Нас аб’ядноўваюць імёны многіх выдатных асоб – Касцюшкі, Каліноўскага, Міцкевіча, Манюшкі, Агінскага, Рушчыца, Орды, Дамейкі, Немана. Гэтыя і многія іншыя імёны аб’ядноўваюць нашы краіны, з’яўляюцца часткай агульнай – польскай, беларускай і еўрапейскай спадчыны”, – падкрэсліў Краўчанка.
 
На яго думку, у Польшчы і Беларусі „розныя падыходы па некаторых пытаннях міжнароднай бяспекі”, але прыналежнасць да розных ваенна-палітычных саюзаў не павінна весці да варожых адносін, гэта „магло б стаць платформай для адказнай дыскусіі на тэму бяспекі па абодва бакі мяжы, якая адначасова з’яўляецца мяжой НАТА і АДКБ”.
 
Пасля ўрачыстага канцэрта адбыўся арганізаваны Пасольствам Рэспублікі Польшча нацыянальны прыём, у якім прынялі ўдзел прадстаўнікі беларускіх улад, навукі, культуры, СМІ, бізнесу і незалежных колаў, дыпламаты і шматлікая польская дыяспара ў Беларусі. У святкаванні ўдзельнічалі таксама дэлегацыі Падляшскага і Люблінскага ваяводстваў, якія прэзентавалі рэгіянальныя традыцыі, у тым ліку стравы польскай кухні.