Onesho la filamu ”People” yanni "Watu”, kwenye siku ya maadhimisho ya miaka minne ya uvamizi wa Urusi dhidi ya Ukraine
24.02.2026
Katika kumbukizi ya miaka minne tangu kuanza kwa uvamizi wa Urusi dhidi ya Ukraine, Ubalozi wa Jamhuri ya Poland jijini Dar es Salaam, kwa ushirikiano na Ubalozi wa Ukraine nchini Tanzania, uliandaa onesho hilo. Filamu hiyo ilijumuisha maonesho ya picha ya "Mama, Sitaki Vita."
Kipengele kikuu cha hafla kilikuwa ni onesho la filamu “People” yaani “Watu”, iliyoongozwa na Maciej Ślesicki na Filip Hillesland. Filamu hii ilionesha kwa uhalisia na kwa mguso wa kina madhara ya vita kwa raia, ikizingatia hadithi binafsi na uzoefu wa watu wa kawaida. Filamu hii inaangazia mwelekeo wa kibinadamu wa mzozo huo na kusisitiza umuhimu wa mshikamano wa kimataifa mbele ya ukiukwaji wa sheria za kimataifa.
Kama sehemu ya hafla hiyo, maonesho ya picha ya “Mom, I Don’t Want War” yaani "Mama, Sitaki Vita” pia yaliwasilishwa. Maonesho hayo ni ushuhuda wa watoto — waathirika wa sasa wa vita nchini Ukraine pamoja na wale waliopitia Vita vya Pili vya Dunia. Ulinganisho wa simulizi za kihistoria na za sasa unaimarisha ujumbe kuhusu hali ya jumla ya mateso ya watoto katika migogoro ya kivita na umuhimu wa kuwalinda kwa mujibu wa sheria za kimataifa za kibinadamu.
Katika hafla hiyo, maneno ya ufunguzi yalitolewa na Sergiusz Wolski, Mkuu wa Kituo, Ubalozi wa Jamhuri ya Poland jijini Dar es Salaam, pamoja na Maksym Nemyria, Kaimu Balozi wa Ubalozi wa Ukraine jijini Dar es Salaam, ambaye alisisitiza umuhimu wa umoja wa jumuiya ya kimataifa katika kukabiliana na uchokozi unaoendelea na haja ya kuendelea kutoa msaada wa pamoja na wa kudumu kwa Ukraine.
