Poland kwenye Tanzania

Jumapili, tarehe 19 Oktoba 2025, Mkuu wa Kituo Ubalozi wa Poland nchini Tanzania, Bw. Sergiusz Wolski, alishiriki katika hafla ya makabidhiano ya Butiama Safe House - makazi salama yaliyoundwa kwa ajili ya kuwahifadhi wasichana wenye umri wa miaka 6–17 wanaokimbia ukeketaji (FGM), ndoa za utotoni, na aina nyingine za ukatili wa kijinsia. Jengo hili limejengwa kwa ufadhili wa serikali ya Poland kupitia mradi wa “Nyumba Salama”. Mradi huu pia unalenga kuwawezesha wasichana kupata elimu ya msingi na ufundi, huduma za afya, elimu ya afya na msaada wa kisaikolojia - hivyo kuwapa fursa ya maisha salama na yenye matumaini bora.

Bw. Wolski pia alihudhuria hafla ya kufunguliwa tena kwa Kituo cha Afya cha Kiabakari, kilichokarabatiwa kupitia mradi wa “Health 2.0” unaotekelezwa na Kiabakari Foundation kwa ushirikiano na Parokia ya Kiabakari na Padre Wojciech Kościelniak, ukifadhiliwa na Polish Aid. Baada ya miaka 17, kituo hiki kitarejea kutoa huduma za afya za msingi kwa wakazi wa Wilaya ya Butiama.

Mradi mwingine uliofanyika Kiabakari kati ya miaka 2024–2025 chini ya ushirikiano wa maendeleo wa Poland (Polish Aid) ni “STOP Kisukari na Upotevu wa Uoni Nchini Tanzania”, uliotekelezwa na Polish Ophthalmologists for Africa Foundation (Wakfu wa Madaktari wa Macho wa Afrika wa Poland). Mradi huu ulitekelezwa katika Kliniki ya Macho na Meno ya Tazama na Tabasamu Kiabakari na katika Hospitali ya Mtakatifu Pio huko Maganzo (Mkoa wa Geita). Lengo kuu lilikuwa kuboresha huduma za matibabu katika kutibu na kuzuia kisukari, shinikizo la damu, na magonjwa ya macho. Kupitia mradi huu, takriban upasuaji 200 wa katarakti ulifanyika, na zaidi ya walimu na wazazi 50 walipata mafunzo kuhusu kinga dhidi ya magonjwa yasiyoambukiza.

Polish Ophthalmologists for Africa Foundation imekuwa ikifanya kazi nchini Tanzania kwa miaka 10, ikitekeleza misheni 34 za matibabu hadi sasa, huku Kliniki ya Tazama ikitoa huduma za macho kwa takribani wagonjwa 1,500 kila mwaka.

Ziara ya Bw. Wolski katika mkoa wa Mara, kaskazini mwa Tanzania, ilikuwa hatua muhimu katika kuimarisha ushirikiano wa maendeleo kati ya Poland na Tanzania - ushirikiano unaojengwa juu ya mshikamano, heshima ya pande zote, na kujitolea kwa pamoja kwa maendeleo endelevu.