Польшча ў Беларусі

Адным з асноўных напрамкаў знешняй палітыкі Рэспублікі Польшча была і будзе палітыка добрасуседства. Развіваючы двухбаковыя адносіны паміж нашымі краінамі, Польшча заўсёды кіравалася павагай да беларускай дзяржавы і народа. Мы падтрымлівалі беларускі народ у працэсе фарміравання ўласнай, суверэннай, незалежнай, свабоднай ад знешняга ўплыву, прыцягальнай у эканамічным плане дзяржавы. Мы заўсёды з вялікім разуменнем падыходзілі да дэмакратычных памкненняў беларускага грамадства, да яго жадання паглыбляць сваю нацыянальную ідэнтычнасць і адначасова паважаць шматкультурную спадчыну нашага рэгіёна.

 Мы верым, што суседнія народы павінны паважаць адзін аднаго, супрацоўнічаць у спрыяльныя часы і аказваць падтрымку ў складаныя часы. Так, як гэта на працягу многіх гадоў робяць палякі і беларусы. Апошнія 30 год палякі і беларусы развівалі грамадскія, культурныя і эканамічныя сувязі. Наведвалі адзін аднаго і знаёміліся бліжэй. Фарміравалі агульны грамадскі капітал нягледзячы на тое, што ў палітыцы нашы краіны ішлі рознымі шляхамі.

 Палітыка, якую Польшча рэалізуе на працягу апошніх 30 год, з дня афіцыйнага прызнання Беларусі незалежнай дзяржавай, ажыццяўляецца і будзе ажыццяўляцца таксама ў сённяшні складаны час, калі беларускі народ фактычна пазбаўлены голасу і магчымасці выказваць уласнае меркаванне мірным і дэмакратычным шляхам. Польшча заўсёды будзе падтрымліваць сваіх беларускіх сяброў: і тых, хто вырашыў заставацца на Радзіме, і тых, хто быў вымушаны – мы глыбока верым, што толькі часова, – эміграваць.

У 30-ю гадавіну прызнання Беларусі незалежнай дзяржавай хочам запэўніць, што Польшча будзе і надалей салідарнай з беларускім народам, разам з ім будзе дабівацца павагі да яго імкнення рэалізаваць дэмакратычныя перамены і разам з ім будзе працаваць дзеля развіцця незалежнай беларускай дзяржавы, нашага добрага суседа.