Польшча ў Беларусі

“Сёння мы сустракаемся, каб узнагародзіць цудоўных людзей, супрацоўнікаў цэнтра “Вясна”, дзякуючы якім на працягу многіх гадоў свет даведваецца пра пераследаванні, дзякуючы якім пакуты не застаюцца безыменнымі, а маюць імя і прозвішча”, – гаварыў Пасол Артур Міхальскі падчас урачыстасці, якую ён назваў сімвалічнай у сувязі з цяперашняй сітуацыяй у Беларусі.

“У іншай сітуацыі гэта ўзнагарода ўручалася б у Польшчы, але зараз, на жаль, у цэнтра “Вясна”, вельмі шмат працы у Беларусі”, – адзначыў Пасол. “Мы сустракаемся, каб выказаць сваю салідарнасць з беларускім народам, які прагне праўды і справядлівасці. Мы знаходзімся сярод сяброў, для якіх суверэнная Беларусь, лёс якой вырашае яе народ, была і застаецца вялікай каштоўнасцю”, – сказаў дыпламат.

З урачыстай прамовай выступіў таксама Вальдэмар Пясецкі, старшыня Таварыства Яна Карскага – фундатара ўзнагароды. Пясецкі, між іншым, прачытаў верш Чэслава Мілаша “Ты, што пакрыўдзіць пасмеў…”.

Узнагарода ўручаецца з 2000 г. Яе яшчэ пры жыцці заснаваў Ян Карскі, пасланнік польскага ўрада ў выгнанні, сведка Халакоста, Праведнік народаў свету. Першымі лаўрэатамі ўзнагароды “Арол” Яна Карскага сталі: ксёндз прафесар Юзаф Цішнер і Яцэк Курань. У цырымоніі ўдзельнічаў Ян Карскі, якога не стала 13 ліпеня 2000 г.