Польшча ў Беларусі

“Пра дапамогу і добрасуседства можна шмат гаварыць, але лепш паказваць яе на практыцы”, – сказаў, вітаючы польскі караван, намеснік Пасла Рэспублікі Польшча ў Рэспубліцы Беларусь Марцін Вайцяхоўскі. Разгрузка адбылася ў лагістычным цэнтры беларускіх мытных органаў у Сенніцы пад Мінскам. Пасол Рэспублікі Польшча ў Рэспубліцы Беларусь Артур Міхальскі падкрэсліў, што “гэта сур’ёзная дапамога”, разам гэта 300 тон розных рэчаў – абсталявання і сродкаў аховы. “Частка, якая трапіла ў Мінск, будзе распаўсюджана па ўсёй Беларусі, а частка дапамогі ўжо трапіла ў чатыры гарады Гродзенскай вобласці”, – сказаў Міхальскі.

“Дзякуй за чарговы жэст сяброўства і добрасуседства”, – сказаў намеснік міністра аховы здароўя Барыс Андрасюк. Ён дадаў, што на пачатку наступнага тыдня дапамога будзе размеркавана паміж установамі, якія змагаюцца з Covid-19, ва ўсіх рэгіёнах краіны. “Мы вельмі рады, што ў гэты складаны для ўсіх час мы можам дапамагчы”, – падкрэсліў капітан Рафал Саловін з Дзяржаўнай пажарнай службы, які кіраваў транспарціроўкай. Сярод 47 грузавікоў, якія ў пятніцу раніцай прыехалі ў Беларусь, былі транспартныя сродкі пажарнай службы, паліцыі і пагранічнай службы.

Як паведамілі польскія дыпламаты, у арганізацыю гуманітарнай дапамогі быў уключаны дапаможны механізм ЕС, таму што яго структуры Беларусь таксама прасіла дапамагчы. У пастаўцы дапамогі, падрыхтаванай па даручэнні ўраду польскімі дзяржаўнымі органамі, пасрэднікам стаў Фонд міжнароднай дапамогі, а пажарную службу падчас транспарціроўкі падтрымалі паліцыя і пагранічная служба.

Шэсць з 47 грузавікоў паехалі ў Гродна, Шчучын, Ваўкавыск і Ліду, каб перадаць дапамогу мясцовым бальніцам. Караван выехаў з Варшавы ў чацвер, 4 чэрвеня, у другой палове дня. Ва ўрачыстасці перадачы дапамогі прынялі ўдзел кіраўнік Канцылярыі прэм’ер-міністра Міхал Дворчык і намеснік Міністра замежных спраў Павел Яблонскі, a таксама Пасол Рэспублікі Беларусь у Рэспубліцы Польшча Уладзімір Чушаў.

Першая партыя гуманітарнай дапамогі прыбыла ў Беларусь напрыканцы красавіка. Тады прывезлі сродкі дэзынфекцыі, антысептыкі і хірургічныя маскі, патрэбныя для барацьбы з распаўсюджаннем эпідэміі COVID-19. Дапамагаючы Беларусі ў барацьбе з пандэміяй віруса COVID-19, Польшча паказвае добрасуседскую салідарнасць і выконвае такім чынам абавязацельствы па Дагаворы аб добрасуседстве і дружалюбным супрацоўніцтве, падпісаным паміж Рэспублікай Польшча і Рэспублікай Беларусь у 1992 г.