Польшча ў Беларусі

“Мы молімся за ахвяр Катынскага злачынства, здзейсненага 81 год таму пад Смаленскам, а таксама ў іншых месцах расстрэлаў НКУС на тэрыторыі СССР”, – сказаў падчас набажэнства епіскап Казімір Велікаселец, апостальскі адміністратар Мінска-Магілёўскай епархіі. У набажэнстве прынялі ўдзел шматлікія прадстаўнікі польскай дыяспары, дыпламаты і вернікі Каталіцкай Царквы.

Дэлегацыя Пасольства Польшчы ў Беларусі ўсклала кветкі да абраза Маці Божай Катынскай, які знаходзіцца ў архікафедральным касцёле ў Мінску і нагадвае пра злачынства, здзейсненае супрацоўнікамі НКУС вясной 1940 г. Пасля набажэнства хор Саюза палякаў на Беларусі выканаў песню ў гонар польскіх афіцэраў – ахвяр Катынскага злачынства.

“Мы вельмі ўдзячны беларускай Каталіцкай Царкве за памяць пра гэтыя падзеі. Мы ўдзячны таксама палякам, якія жывуць у Беларусі, за тое, што не забываюць. Дзякуючы гэтаму тыя, хто тады загінуў, жывуць у нашых сэрцах і нашай памяці”, – сказаў Часовы Павераны ў Справах Польшчы ў Беларусі Марцін Вайцяхоўскі. “Памяць пра мінулае – гэта адзін са стаўпоў свабоднай Польшчы і нашай агульнай будучыні”, – дадаў дыпламат.

5 сакавіка 1940 г. Сталін і члены Палітбюро ЦК УКП(б) падпісалі загад аб расстрэле польскіх афіцэраў, інтэрніраваных пасля 17 верасня 1939 г. і зняволеных у турмах і лагерах на тэрыторыі СССР. У выніку ліквідацыя трох лагераў – Казельскага, Старабельскага і Асташкаўскага – былі расстраляны 14 587 польскіх палонных. У адпаведнасці з гэтым жа загадам былі таксама забіты каля 7300 палякаў, якіх НКУС трымаў у турмах на тэрыторыі колішніх усходніх ваяводстваў Другой Рэчы Паспалітай.