Польшча ў Беларусі

“Мы знаходзімся на могілках польскіх воінаў, але молімся за ўсіх ахвяр вайны”, – гаварыў, наведваючы месцы памяці, намеснік Пасла Польшчы Марцін Вайцяхоўскі. “Вельмі важна, што тут не толькі мы, разам з намі прысутнічаюць прадстаўнікі мясцовай супольнасці, у тым ліку члены польскай дыяспары, улад і духавенства. Гэта значыць, што памяць пра мінулае нас аб’ядноўвае, нават калі яно было складаным”, – дадаў ён.

Намесніца старшыні Глыбоцкага райвыканкама Таццяна Тарасевіч сказала, што на тэрыторыі раёна знаходзяцца трое могілак воінаў, якія загінулі падчас польска-бальшавіцкай вайны, з якіх двое – у Глыбокім і Падсвіллі – былі адноўлены ў апошнія два гады ў рамках прац, якія вяліся на сродкі польскага Міністэрства культуры і нацыянальнай спадчыны ў рамках праекта Фонда дапамогі палякам на Усходзе. Яна сказала, што “застаецца аднавіць яшчэ могілкі ў Псуі”.  І дадала, што “могілкі з’яўляюцца сімвалам нашай агульнай гісторыі”.

Удзел ва ўрачыстасцях у Падсвіллі, Задарожжы і Слабодцы прынялі таксама мясцовыя святары і жыхары. “Гэтыя месцы не зніклі з карты дзякуючы намаганням простых людзей, якія дзесяцігоддзямі прыбіралі іх, прыносілі кветкі, лампадкі. Цяпер, пасля аднаўлення, яны захаваюцца яшчэ на больш працяглы час, а людзі будуць яшчэ з большым запалам клапаціцца пра іх”, – гаварыў ксёндз Эдуард, пробашч Задарожскай парафіі. Старшыня Падсвільскага сельсавета Анатоль Ерашэвіч нагадаў, што населены пункт з’явіўся пасля польска-бальшавіцкай вайны вакол гарнізона часткі Корпуса аховы памежжа, які абараняў  мяжу з СССР. Польскія салдаты пабудавалі мясцовы касцёл і шмат зрабілі дзеля развіцця мясцовай супольнасці.

Дыпламаты Пасольства Рэспублікі Польшча ў Рэспубліцы Беларусь наведваюць могілкі з нагоды 100-й гадавіны пачатку польска-бальшавіцкай вайны. Акцыя будзе працягвацца да канца года. На тэрыторыі Беларусі зарэгістравана 44 польскіх вайсковых могілак. Індывідуальныя магілы польскіх воінаў, у тым ліку загінуўшых падчас польска-бальшавіцкай вайны, знаходзяцца таксама на многіх мясцовых могілках, некаторыя толькі знаходзяць, таму што ў камуністычныя часы яны былі знішчаныя альбо забытыя.