Святкаванне 81-й гадавіны з дня нараджэння Чэслава Немэна
17.02.2020
У Старых Васілішках каля Шчучына ў нядзелю, 16 лютага, адбыліся ўрачыстыя мерапрыемствы, прысвечаныя 81-й гадавіне з дня нараджэння Чэслава Немэна. Падчас урачыстасцей былі падведзены вынікі праекта рамонту даху ў колішнім доме Немэна, дзе зараз знаходзіцца музей музыканта. Праект быў рэалізаваны дзякуючы падтрымцы Інстытута “Polonika”.
Урачыстыя мерапрыемствы былі сканцэнтраваны вакол пераўтворанага ў музей дома сям’і музыканта. У мясцовым касцёле, дзе спевака хрысцілі і дзе знаходзіцца памятная дошка, адбылося набажэнства. Прысутныя беларускія журналісты ўспаміналі інтэрв’ю з Чэславам Немэнам. Яны падкрэслівалі, што для беларусаў у савецкі час ён быў своеасаблівым голасам свабоды. Прыхільнікі творчасці музыканта ўсё ахвотней наведваюць колішні дом спевака. У мінулым годзе гасцей было амаль 10 тыс., пераважна з Польшчы, але таксама з іншых краін, у тым ліку такіх экзатычных, як Кітай і Камерун.
Марцін Вайцяхоўскі, намеснік Пасла Польшчы ў Беларусі, адзначыў, што Чэслаў Немэн з’яўляецца адной з тых постацей, якія аб’ядноўваюць Польшчу і Беларусь. – Месца яго нараджэння – Старыя Васілішкі – гэта святыня для прыхільнікаў музыкі Немэна, а таксама тых, хто шукае агульныя элементы ў польскай і беларускай культурах, – сказаў Вайцяхоўскі.
Нацыянальны інстытут польскай культурнай спадчыны за мяжой “Polonika” ў мінулым годзе фінансаваў рамонт даху ў доме Немэна, за што атрымаў шматлікія падзякі ад прадстаўнікоў мясцовых улад, жыхароў і фанатаў Немэна. Інстытут “Polonika” фінансаваў рамонт даху, які быў пакрыты этэрнітам. Было таксама рэканструявана старое драўлянае пакрыццё. Працы выконвала беларуская кампанія ў рамках плана, падрыхтаванага экспертам Міністэрства культуры і нацыянальнай спадчыны Польшчы. Кошт прац склаў 26 тыс. еўра, – сказала прысутная на мерапрыемствах прэс-сакратар Інстытута “Polonika” Марта Шафранак.