Польшча ў Беларусі

„Мы перадалі Канцэнтратар кіслароду і апарат ШВЛ анкалагічнаму аддзяленню 1-й клінічнай бальніцы г. Мінска”, – сказаў намеснік пасла Польшчы ў Беларусі Марцін Вайцяхоўскі.

І дадаў, што ў перыяд пандэміі Covid-19 аддзяленне было перапрафілявана, і тут лячылі хворых на каранавірус, а зараз  яно вяртаецца да нармальнага рэжыму працы.

„Гэтыя апараты будуць служыць і тым, хто хварэе на Covid-19, і пацыентам, хворым ракам. Яны былі набыты на сродкі праграмы “Польская дапамога” г.зв. малых грантаў Пасольства Рэспублікі Польшча ў Рэспубліцы Беларусь менавіта для падтрымкі ў барацьбе з пандэміяй”, – сказаў Вайцяхоўскі.

Партнёрам гэтага праекта быў Сінадальны аддзел па дабрачыннасці і сацыяльнаму служэнню Беларускай праваслаўнай царквы. Як сказаў Польскаму агенцтву друку яго кіраўнік а. Кірыл Шолкаў, які даўно займаецца дапамогай анкалагічным хворым, апараты для падтрымкі дыхання вельмі важныя і для гэтай катэгорыі пацыентаў.

„Часта, асабліва на апошняй стадыі хваробы, у пацыентаў узнікаюць праблемы з дыханнем”, – патлумачыў ён. Святар сказаў, што менавіта таму Царква супрацоўнічае з Міністэрствам аховы здароўя ў рамках праекта „Дыханне” і на сабраныя сродкі набывае для анкалагічных бальніц неабходнае абсталяванне. „У перыяд пандэміі каранавіруса гэта праблема стала яшчэ больш актуальнай”, – падкрэсліў ён.

Вартасць перададзенай у  чацвер Мінскай бальніцы дапамогі складае 22,7 тыс. еўра. Як сказаў намеснік пасла, гэта адзін з праектаў, рэалізаваных у рамках праграмы падтрымкі Беларусі, у т.л. у барацьбе з пандэміяй. Адрасатам многіх з іх з’яўляецца беларускі каталіцкі “Карытас”. „Пасля двух вялікіх партый гуманітарнай дапамогі гэта чарговы важны сігнал, што мы не пакідаем нашых суседзей у бядзе”, – дадаў дыпламат. У канцы красавіка і на пачатку чэрвеня ў Беларрусь прыбылі дзве вялікія партыі гуманітарнай дапамогі з Польшчы. Разам больш за 50 грузавікоў даставілі сродкі дэзынфекцыі і асабістай аховы, лекі і медыцынскае абсталяванне.