Заява МЗС адносна ўсталявання ў Беларусі новага свята пад назвай Дзень народнага адзінства
09.06.2021
МЗС з абурэннем успрыняло рашэнне ўлад Беларусі прызначыць новае свята пад назвай Дзень народнага адзінства на 17 верасня. Выкарыстанне ў якасці падставы гістарычнай палітыкі Беларусі наступстваў пакта Сталіна і Гітлера немагчыма зразумець. Гэты жэст упісваецца ў расійскія дзеянні, мэтай якіх з’яўляецца ўласная інтэрпрэтацыя вельмі складанай гісторыі нашага рэгіёну, і ён сур’ёзна ўскладніць Беларусі дыялог і зразуменне з суседнімі дзяржавамі, а таксама дзяржавамі ўсёй Еўропы.
17 верасня 1939 года Савецкі Саюз напаў на Польшчу, якая сам-насам змагалася з войскамі гітлераўскай Германіі. Такім чынам Савецкі Саюз рэалізаваў тайны пратакол да падпісанага СССР і Трэцім рэйхам 23 жніўня 1939 года пакта Молатава – Рыбентропа, які непасрэдна прывёў да Другой сусветнай вайны. Гэты сумесны савецка-нацысцкі напад на Польшчу распачаў самую жахлівую ў сусветнай гісторыі вайну, якая пазбавіла жыцця 60 мільёнаў людзей, у тым ліку жыхароў Беларусі. Многія з іх загінулі ў германскіх і савецкіх канцэнтрацыйных лагерах. 17 верасня 1939 года азначала для соцен тысяч польскіх грамадзян пазбаўленне грамадзянства, годнасці і смерць у глыбіні савецкай Расіі.
Пра тое, якое значэнне мела 17 верасня 1939 года для Цэнтральнай і Усходняй Еўропы, сведчыць рэзалюцыя Еўрапейскага Парламента ад 19.09.2019 г. аб значэнні еўрапейскай гістарычнай памяці для будучыні Еўропы. Гэта рэзалюцыя станоўча і адназначна падкрэслівае адказнасць за пачатак Другой сусветнай вайны дзвюх дзяржаў – нацысцкай Германіі і савецкай Расіі. Дакумент нагадвае і пра ваенны падзел Еўропы, які быў вынікам імперскай палітыкі СССР. Звяртаецца таксама ўвага на шматгадовае зняволенне дзяржаў Цэнтральнай і Усходняй Еўропы пад кіраўніцтвам Масквы і жорсткай камуністычнай ідэалогіі.
Усталяванне Дня народнага адзінства дзеля ўшанавання факта ўключэння Беларусі ў склад Саюза Савецкіх Сацыялістычных Рэспублік – гэта ўсхваленне савецкай спадчыны і спроба адрэзаць Беларусь ад яе сапраўдных каранёў. Гэта акт, які падвяргае сумненню незалежнасць і суверынітэт Беларусі.
Тым большую павагу выклікае актыўнасць беларускага народа, ідэнтычнасць якога абапіраецца на сапраўдную гістарычную і культурную спадчыну незалежнай Беларусі.
Прэс-служба
Міністэрства замежных спраў