У садзе Кшыштафа Пэндэрэцкага
20.05.2020
Інстытут Адама Міцкевіча ў віртуальнай прасторы будуе інтэрактыўны сад, натхнёны творчасцю Кшыштафа Пэндэрэцкага. „Penderecki’s Garden” поўнасцю расцвіце ў лістападзе, аднак ужо зараз карыстальнікі могуць назіраць, як развіваецца праект.
Сад Пэндэрэцкага – гэта лічбавы праект, не толькі прысвечаны памяці кампазітара, ён таксама дазваляе бліжэй пазнаёміцца з яго постаццю і паказвае ўплыў на сучасную сусветную музыку і іншыя галіны мастацтва. Галоўным матывам праекта з’яўляецца адно з найвялікшых захапленняў Кшыштафа Пэндэрэцкага – сад.
У віртуальнай прасторы карыстальнікі змогуць паслухаць творы Маэстра, пазнаёміцца з яго біяграфіяй і творчасцю. Аднак гэта не будзе толькі база ведаў, але і мастацкая прастора, у якой будуць прадстаўлены творы іншых артыстаў, на стварэнне якіх натхніла творчасць Кшыштафа Пэндэрэцкага.
Сад Пэндэрэцкага разлічаны на міжнародную аўдыторыю – усе матэрыялы будуць публікавацца на англійскай мове. Прэм’ера запланавана на 23 лістапада, да чарговай гадавіны з дня нараджэння Маэстра. Ужо зараз на сайце www.PendereckisGarden.pl можна назіраць, як развіваецца праект.
Чакаючы прэм’еры, можна згуляць у падрыхтаваную Інстытутам Адама Міцкевіча гульню “Гукавое memory”, у якой замест малюнкаў трэба злучыць у пары фрагменты твораў Кшыштафа Пэндэрэцкага. Гульня даступна на сайце www.MemoryPenderecki.pl.
Праект з’яўляецца часткай каардынаванай Інстытутам Адама Міцкевіча міжнароднай культурнай праграмы, рэалізаванай у рамках шматгадовага праекта “незалежная” на 2017–2022 гг.