Полска во Северна Македонија

Во периодот од 1 до 2 септември оваа година, полска владина делегација, предводена од заменик-министерот за внатрешни работи и администрација Мацјеј Душчик, престојуваше во официјална посета на Република Северна Македонија. Средбите во Скопје и студиските посети на пограничните подрачја беа посветени на утврдување нови насоки за билатералната соработка во услови на современите геополитички предизвици. Во делегацијата, покрај заменик-министерот Душчик, учествуваа и експерти од надлежните сектори на Министерството за внатрешни работи и администрација на Република Полска, како и шефот на Амбасадата на Република Полска во Скопје. Централна точка на посетата беше билатералната средба на Мацјеј Душчик со неговиот македонски колега, заменик-министерот Астрит Исени. Во фокусот на разговорите беше регионалната безбедност. Претставниците на двете министерства детално ги разгледаа механизмите за спречување на нелегалната миграција, сузбивање на меѓународниот организиран криминал и борба против трговијата со луѓе. Важен дел од агендата беше посетата на полската делегација на Полициската академија, каде што делегацијата се запозна со системот за обука и стручно усовршување на полициските службеници. Воедно, беа разгледани можностите за реализација на заеднички проекти во областа на полициската едукација и обука. Полската делегација го посети и граничниот премин Табановце, каде што се распоредени припадници на Европската агенција за гранична и крајбрежна стража – Фронтекс. На граничниот премин се одржа работна средба со претставници на Фронтекс и македонските полициски служби. На делегацијата ѝ беа презентирани, меѓу другото, начинот на функционирање на Заедничкиот контакт-центар, како и досегашните оперативни резултати од тесната соработка меѓу Северна Македонија и Фронтекс.