Լեհաստանը Հայաստանում

«Nowa Ikona / Նոր Սրբապատկեր» խորագիրը կրող ցուցահանդեսն իրականացվում է Հայաստանում Լեհաստանի Հանրապետության դեսպանատան և Լեհաստանի «Նովիցայի ընկերներ» ասոցիացիայի („Stowarzyszenie Przyjaciół Nowicy”) հետ համատեղ նախաձեռնությամբ: Ցուցահանդեսին ներկայացված են 2 տասնյակ գործեր, որոնք ստեղծվել են 2009-2021 թվականներին Լեհաստանի Նովիցա գյուղում անցկացվող ամենամյա` «Międzynarodowe Warsztaty Ikonopisów w Nowicy» աշխատարանների շրջանակներում` Լեհաստանի, Ուկրաինայի և Վրաստանի սրբանկարիչների կողմից:

#NowaIkona ցուցահանդեսի բացման արարողության սկզբում ՀՀ-ում Լեհաստանի արտակարգ և լիազոր դեսպան Պավել Չեպլակը հայ-լեհական մշակութային հարաբերությունների զարգացման գործում մեծ ներդրում ունեցած անձանց շքանշաններ շնորհեց: Լեհաստանի մշակույթի և ազգային ժառանգության նախարարի կողմից շնորհվող «Լեհական մշակույթին նվիրյալ» շքանշաններ հանձնվեցին «Նարեկացի» արվեստի միության հիմնադիր Նարեկ Հարությունյանին, դաշնակահարուհի և կոմպոզիտոր Լիանա Փիրումովային, գրող և թարգմանիչ Գագիկ Դավթյանին:

#NowaIkona ցուցահանդեսի բացմանը ներկա էին ՀՀ-ում դիվանագիտական կորպուսի ներկայացուցիչներ` ՀՀ-ում ԵՄ դեսպան Անդրեա Վիկտորինը, ՀՀ-ում Լիտվայի դեսպան Ինգա Ստանիտե-Տոլոչկիենեն, ՀՀ-ում Ֆրանսիայի դեսպան Անն Լույոն, ՀՀ-ում Գերմանիայի Վիկտոր Ռիխտերը, ՀՀ-ում Իտալիայի դեսպան Ալֆոնսո Դի Ռիզոն, ՀՀ-ում ՈՒկրաինայի դեսպանության Առաջին Քարտուղար Վիկտոր Օլիյնիկը, ՀՀ-ում Հնդկաստանի դեսպանության Երկրորդ Քարտուղար Տեջաս Սանջայ Պագարը: Միջոցառմանը ներկա էին նաև ՀՀ ԱԳՆ-ի Եվրոպայի վարչության պետ Տիգրան Սամվելյանը և Սահմանակից երկրների վարչության պետի պաշտոնակատար Վահագն Աֆյանը, Մայր Աթոռի ներկայացուցիչներ Արքեպիսկոպոս Նաթան Հովհաննիսյանը և Հայր Ասողիկ աբեղա Կարապետյանը, ՄԱՀՀԻ հիմնադիր, քաղաքագետ Ստյոպա Սաֆարյանը, ՄԱԿ-ի փախստականների հարցերով գերագույն հանձնակատարի գրասենյակի ներկայացուցիչ Աննա-Կարին Օսթը, Երևան քաղաքի առևտրաարդյունաբերական պալատի և հասարակական կազմակերպությունների ներկայացուցիչներ, որոնց թվում էր նաև Հայաստանում լեհերի` «Polonia» միության անդամները:

#NowaIkona ցուցահանդեսի բացման ընթացքում երաժշտական կատարումներով հանդես եկան դաշնակահարուհի Լիանա Փիրումովան և Հայաստանում «Պոլոնիա» լեհերի միության «Malwy» վոկալ համույթը` երգչախմբային դիրիժոր Անահիտ Տեր Մելիքսետյանի ղեկավարությամբ: Երաժշտական կատարումներից հետո բանաստեղծ և թարգմանիչ Գագիկ Դավթյանը ընծայագրերով մասնակիցներին նվիրեց իր թարգմանած արդի լեհական պոեզիայի «Որպես ձեռքսեղմում» խորագրով անթոլոգիայի օրինակներից` առանձնահատուկ կերպով նշելով իր ծննդյան 75-ամյա հոբելյանը: