Լեհաստանը Հայաստանում

2026 թվականին ՀՀ-ում Լեհաստանի Հանրապետության դեսպանությունը երկրորդ անգամ հանդես եկավ որպես Երևանում անցկացվող «Թատերական պաստառի միջազգային բիենալեի» աջակից։

Բիենալեն Հայաստանի մայրաքաղաքում կազմակերպվում է երկու տարին մեկ անգամ։

Այս տարվա Բիենալեին մասնակցել է 75 երկիր, 844 արվեստագետ ներկայացրել են 1708 պաստառ։ Ցուցահանդեսի նախնական փուլն անցել են 49 երկրից 194 դիզայների 203 պաստառ։

Բիենալեն նպաստում է Հայաստանում պաստառի արվեստի նկատմամբ հետաքրքրության աճին՝ ստեղծելով բացառիկ հնարավորություն անմիջականորեն ծանոթանալու բազմաթիվ աշխատանքների և կապեր հաստատելու ոլորտի նշանավոր ստեղծագործողների հետ։ Պաստառը, որպես քաղաքային մշակույթի կարևոր բաղադրիչ, պետք է ներկա լինի հանրային տարածքում, հաղորդակցվի հանդիսատեսի հետ և նրան դարձնի անմիջական մասնակից, ինչին փառատոնը լիարժեքորեն նպաստում է։

Ընտրված աշխատանքների շարքում ներկայացված են 47 լեհ արվեստագետների ստեղծագործություններ, ինչը վկայում է լեհական պաստառի միջազգային նշանակության մասին և ընդգծում դրա կարևոր դերը համաշխարհային միջմշակութային երկխոսության մեջ։

Լեհական կողմի համար այս նախաձեռնությանը մասնակցելը հնարավորություն է ներկայացնելու լեհական պաստառի դպրոցի ձեռքբերումները Հայաստանում, ամրապնդելու միջմշակութային երկխոսությունը և խթանելու փորձի փոխանակումը Լեհաստանի, Հայաստանի և այլ երկրների արվեստագետների միջև։ Բիենալեն էականորեն նպաստում է պաստառի՝ որպես գեղարվեստական ինքնարտահայտման կարևոր ձևի և տեսողական հաղորդակցության միջոցի հանրահռչակմանը։

Պաստառները գնահատվել են միջազգային ժյուրիի կողմից, իսկ լավագույն աշխատանքներն արժանացել են մրցանակների և հատուկ դիպլոմների։

Ս. Թ. սեպտեմբերի 10-ին Երևանի Գեղագիտության ազգային կենտրոնում տեղի ունեցած ցուցահանդեսի հանդիսավոր բացման ընթացքում հենց հայտարարվեցին մրցանակակիրների անունները։

Այս տարվա Լեհաստանի ձեռքբերումները ներառում են՝

Գլխավոր մրցանակ (Grand Prix)– պրոֆ. Լեխ Մաևսկի (Վարշավայի պաստառի միջազգային բիենալեի նախագահ, Վարշավայի Գեղարվեստի ակադեմիայի պրոֆեսոր)։

Պատվոգիր (Diploma of Recognition) – դոց. դոկտոր Մագդալենա Վոշիկ (Գեղարվեստի ակադեմիայի պրոֆեսոր, Վրոցլավի Եվգենիուշ Գեպերտի անվան Գեղարվեստի ակադեմիայի դասախոս)։

Դեսպանությունը ջերմորեն շնորհավորում է մրցանակակիրներին։

«Թատերական պաստառի միջազգային 3-րդ բիենալեի» պաշտոնական բացման հաջորդ օրվանից մինչև ս․թ․ սեպտմբերի 30-ը առավոտվանից մինչ երեկո Հայաստանի գեղագիտության ազգային կենտրոնի դռները բաց էին պաստառների ցուցահանդեսի այցելուների համար։